市場熱線：中通服勝在夠穩陣

祖國要控制農產品價格，香港都唔執輸，亦要「鬥地主」，新引入嘅三級制額外印花稅屬針對炒家，今次都算重手，另外調低中高價樓按揭成數。一、兩年之後花旗乜QE都完，到時可能加息希望重燃。

上周五人行又調高存款準備金率，總算好過加息。A股臨尾個多鐘奇迹反彈，由day low彈到day high。

A股不嬲好難估，下晝同上晝已經兩個唔同世界，港股同A股同步開波其實冇乜用，反而如果食飯時間銜接更實際，但大陸11點半就食「早飯」，香港人肯定唔習慣。中國信貸（08207）以全配售方式上市，開波一鳴驚人，高配售價成倍，收市仍升42.6%。隻股係上海「安信兄弟」，向中小企發3至6個月短期貸款，平均月息約4厘，最緊要係向債仔攞房地產做抵押，所以幾乎唔會有壞帳。不過，上市後「晒士」唔同咗，生意會唔會跟住同步做大係疑問。

內地有報道話有條村村民集體血鉛超標，附近起廠嘅超威（00951）被懷疑係黑手，上周五唔夠半粒鐘就拉閘，事件真相暫時未知，但理士（00842）同天能（00819）就捱沽。鉛酸蓄電池正爭取成新能源汽車電池，享受國家補貼。鉛酸電池係新能源？又幾搞笑！

業務表現四平八穩

中通服（00552）上市以來正一衰股，但由九月開始洗走啲衰氣，穩步上揚，呢排就算個市調整依然硬淨，上周五再升3.58%收報4.91元，又逼近52周新高，但一日未穿5蚊都唔可以講轉弱為強。中銀國際前兩日出咗份報告，話佢現價只係出年預測PE11倍幾屬於吸引，睇該股值5.55元。

其實中通服過去四年業務都好穩定，收入同盈利幾乎同步，純利率喺4%左右冇乜郁過，○九年每股盈利賺多18.7%，一○年料賺多14%，跟住幾年每年都係十幾個巴仙複式增長，有人可能覺得買呢類咁穩定嘅股冇乜癮，但長線投資算係幾好選擇，往績息率有3厘半，出年將提高到4%以上。

電訊行業嘅開支唔少得，未來幾年3G、4G、寬頻陸續升級，做光纖網絡建設兼埋保養會繼續好景，中通服係全國最大又技術最好，兼有三大電訊商做股東，講到穩陣非佢莫屬，呢排個市咁波動，宜守不宜攻。

戰報

長城汽車（02333）+8%

上周五小尾在推介長城汽車，最低見過25.3元，午市掃上最高見27.4元，即日最多升8.3%。

利信達（00738）+8%

帥哥上周五推介利信達，即市低位見3.84元，升到即市高位4.17元，單日最大升幅8.6%。

古勝