踏入第四季，香港新股熱持續，但原來美國嘅新股市場一樣活躍，其中唔少新股係由內地赴美掛牌嘅企業。有統計指出，第四季至今已有十二家大陸企業登陸美股，融資總額達十四點八億美元，當中幾家相信大家唔會陌生，好似優酷網及土豆網都係唔少港人經常瀏覽嘅網站。近日內地大型Ｂ２Ｃ網站當當網亦已喺美國提交ＩＰＯ申請，計劃喺當地發行不超過二億美元美國存託股份（ＡＤＳ），其股票交易代碼為「ＤＡＤＡ」。
當當網由俞渝與丈夫李國慶喺九七年創辦，經營圖書零售，當時一度被憧憬為「中國亞馬遜」。據當當網招股說明書摘要顯示，至九月底該網提供圖書約五十九萬本，除咗係中國最大嘅圖書零售商，更同時銷售母嬰用品、小家電、服裝及化妝品等，似乎依家嘅當當網已經唔只係「中國亞馬遜」咁簡單，直頭係轉型做「網上沃爾瑪」。
余絲韻