絲絲講場：郭台銘得虎子 老而彌堅繼續生
「終得虎子」嘅鴻海集團老闆郭台銘，為咗同大眾分享佢再為人父嘅喜悅，就喺愛妻曾馨瑩尋日朝早誕下麟兒嘅3個幾鐘頭後，召開記者會宣布郭家再添一名生力軍，取名「守善」，係希望佢能夠永保出世時善良嘅赤子之心。
早前外傳曾馨瑩佗住孖胎，其後曾爸爸澄清只係「單胞胎」，之後郭台銘特登話預產期喺下月，到尋日又突然宣布生咗，咁峰迴路轉都只係唔想傳媒再闖入醫院亂摷，佢尋日都有同記者講唔好意思。
取名「守善」命格好
郭台銘話檢查過囝囝嘅手腳都好健康，佢又感謝上天，令一個60歲嘅老人重拾幸福，畀咗佢第二春。佢猛話有細路真係好，開心過中六合彩，佢好肯定咁話，一定會「繼續生落去」，領略新生命嘅喜悅係任何物質及金錢都比唔上嘅。
為咗兩個細路嘅奶粉錢，郭台銘已決定繼續拚搏事業，延遲退休咁話喎。講番囝囝個名，佢話原本想叫做「守成」，後來諗吓驚股價會跌，因為守成唔易，所以作罷。據命理學家話，郭守善嘅命盤係「萬中選一」，能夠掌權、掌財，第日可以成為適當嘅接班人，佢同父母相處融洽，仲會愈大愈靚仔添，郭董可以放心喇！
余絲韻