絲絲講場：百周年酒會財氣盛 金貿易牌貴「封盤」
全球資金大氾濫，金價冇辦法唔升，揸住牌照做金業生意嘅就更加發到豬頭咁，絲絲尋日去咗金銀業貿易場一百周年酒會，見到好多金商蓮子容咁嘅樣，就知佢哋有幾好景。
金價早前係咁升，金銀業貿易場個牌價亦自然水漲船高。依家已升到去500萬元，不過都冇人願意沽出。詹培忠個仔詹劍崙就同絲絲講，話直情冇諗住賣喎，證明佢好睇好後市，有大把「錢途」啦！
金業好景假網充斥
事實上，金業真係好似好好景喎。除咗依家成日喺電視見到金商賣廣告招攬客戶外，本身亦有經營黃金業務嘅證券學會會長李細燕就話，金價依家急升，內地客投資黃金興趣濃厚，佢間公司就喺內地出現咗9個虛假網站。
吓？真係好誇張喎，如果唔係有咁多人想炒金，點會有咁多虛假網站？睇嚟有關方面真係要嚴打。出現咁多虛假網站，亦印證咗金銀業貿易場個牌價何解係咁升，睇番金銀業貿易場嘅網站，近期真係不斷有金商公告話喺內地發現虛假網站，呢個問題真係不容忽視。
余絲韻