新股現代牧業（01117）養嘅乳牛好鬼精靈，中環老友前排去咗參觀，佢話為咗令啲牛牛心情靚啲、產多啲奶，牧場就提供星級待遇，每隻牛牛除咗有「個牛空間」，可以獨佔一間外，佢哋仲有按摩設施同埋有得聽音樂添！日日聽住莫扎特嘅音樂，所以啲牛牛都特別精靈，一見到部按摩機就識自己行埋去歎Massage，平時要擠奶時，佢哋亦會「自動埋位」！
講到擠牛奶，原來現代牧業嘅擠奶設備係全自動化，不經人手以確保清潔，而啲牛牛見到部擠奶機同見到按摩機一樣，亦會自己行上去，絕對係勤力牛。
講開又講，現代牧業喺全國有11個牧場，分布喺唔同地點，老友話佢都去過幾個，不過去得牧場，最大嘅印象係「臭」。牧場分散係方便運輸到唔同嘅城市，仲可以避免一旦有傳染病爆發時，啲畜口「一鑊熟」添！
余絲韻