三網融合概念喺香港係威係勢咗一陣子，但投資者似乎唔係咁受落，最近先後有傳媒爆料話，土豆網正計劃到美國上市籌集最多1.2億美元，有「中國YouTube」之稱嘅優酷網日前亦向美國證券交易所提交上市申請，聽講集資額最多達1.5億美元，莫非美國投資市場對擁有三網融合概念嘅公司特別鍾情？
對於被稱為「中國YouTube」，咪以為優酷網一定好高興，佢哋嘅集團首席執行官古永鏘曾講過，喺4年前成立嘅優酷網並非YouTube嘅複製品，佢話YouTube嘅主要內容係音樂視頻及短片剪輯，而優酷網有60%內容係電影等長片，而且佢哋約有70%嘅內容仲係專業製作喎。根據有關嘅監管文件顯示，優酷網去年銷售額為2,250萬美元，但淨虧損就有2,670萬美元（約2.08億港元），反映優酷網仲喺投資期當中。
余絲韻