絲絲講場：黃光裕入局嫡系有來頭
記得喺兩個月前，國美（00493）嘅「陳黃內戰」鬥到水火不容，正當大家都以為冇乜彎轉嘅時候，公司就發通告話陳、黃兩個陣營得到初步和解，陳曉嗰邊終於肯畀黃光裕嘅兩位嫡系人士入局，即係其胞妹黃燕虹以及鄒曉春，不過仲要等埋下月十七日嘅特別股東大會通過先得。
通函建議投贊成票
兩人曾經喺九月嘅特別股東會上爭取入局，最終敗陣。既然依家兩個陣營有偈傾，股東通函就梗係建議股東投贊成票，通函仲用咗三大版篇幅去介紹鄒、黃兩人嘅背景，非常詳盡。
兩人都只係三、四十歲，其中又以鄒曉春嘅描述較多，佢從事律師工作已差唔多20年，喺國美都做咗9年法律顧問，亦喺唔少內地上市公司做過董事，唔怪得黃光裕咁睇重佢！
依家耐唔耐就會再傳出國美主席陳曉離職嘅消息，佢近日接受內地媒體訪問時話，無論管理層、大股東、投資者貝恩都意識到，穩定嘅團隊令公司利益最大化，簡而言之，即係話佢唔會走。兩大陣營和解加上今年首三季盈利增長理想，券商即刻唱好國美，仲調高佢哋嘅目標價添。
余絲韻