「股神」巴菲特上月底宣布委任年僅39歲嘅對沖基金經理庫姆斯（Todd Combs），作為巴郡首席投資總監後，後者幾乎等於做硬「股神」接班人，雖然各界都爭相翻查庫姆斯嘅身世，但資料有限，連佢嘅廬山真面目都一度成謎，甚至有人肯出錢買相。事隔一個月，終於有兩名傳媒影到佢嘅相，搞到好似如獲至寶咁。
彭博社尋日就登咗幾張庫姆斯嘅相片，聲稱係佢喺上月三十日出席史丹福嘅曲棍球比賽時所攝，身穿便服嘅庫姆斯都有啲年輕氣息。差不多喺同一時間，《財富》雜誌亦有登佢嘅相，據講兩張相嘅拍攝時間只相距兩星期，係庫姆斯出席巴郡董事會議嘅照片，身穿整齊西裝嘅佢，成個沉實穩重嘅生意人一樣。兩張相有咁嘅分別，應該係受衣着影響。
庫姆斯仍要為依家管理嘅對沖基金執埋啲手尾，要到明年一月先可以正式去巴郡返工。不過貴為新一任首席投資總監，又點可以唔率先認識吓其他重要嘅董事局成員呢？所以庫姆斯特別獲邀出席本月初舉行嘅巴郡董事局會議。佢喺巴菲特最愛餐廳之一嘅Piccolo Pete's首次向其他巴郡董事作自我介紹，包括微軟創辦人蓋茨及Comcast營運總監伯克等。
會議嘅重點，其實係巴菲特向董事局交代庫姆斯未來嘅職權。原來庫姆斯初期只會管理約20億至30億美元嘅投資，雖然金額只係巴郡總值1,130億美元投資組合嘅九牛一毛，但已遠遠多於庫姆斯依家管理嘅4億美元對沖基金。庫姆斯初期嘅人工將與GEICO資本部舵手辛普森一樣，除咗底薪，仲可以根據投資表現跑贏標指嘅比例而獲派花紅。
余絲韻