市場熱線：金蝶逆市展強勢

A股陰陽怪氣，呢3日兩陰夾一陽，前日臨尾挾起錢莊股，尋日到下晝重磅股一仆一碌，滬綜指跌近4%收報2,894點，又係話驚緊縮，呢個藉口萬試萬靈。

糧食價大漲藏危機

祖國近日放風話會控制物價，主要係農產品，甚至有消息話係阿爺出手沽空商品期貨。尋日食品股跌得幾傷，中糧（00606）、康師傅（00322）同統一（00220）都跌5%以上。

農產品價格係易升難跌，因為各國都係自用為先，全球貿易量只及產量約一成，有某國因天氣問題失收嘅話，全世界都頭痕。仲有好多因素：例如農地轉做工業及住宅用地，土地沙漠化及鹽化需要輪休，中國食肉大增（1斤牛肉要10斤穀物飼料）等，使到糧食庫存一路減少。油價依家有排未返高位，但糧價已經不斷創新高，咁嘅趨勢咪話唔大鑊。

另有消息話出年買細車嘅優惠會取消，加埋收車船稅，車股肯定當災。十月賣車已經少過九月，但如果出年優惠取消嘅話，可能谷埋呢個半月趁優惠買車之後，車市會盛極而衰。汽車可拉動幾十個周邊行業，對GDP貢獻高達一成。不過，前排五中全會已經淡化GDP嘅重要性，對樓對車應避風頭。

逆市奇葩嘅主要係零售股，尤其係金舖股，無論金價係升係跌都咁勁。另外逢親珠海航天展例牌炒吓航天股，中航科工（02357）同航天控股（00031）都乘機升空，前日出咗單新聞話中國會開放低空領域，對前者屬於有利。

另一隻奇葩股係金蝶國際（00268），由今年開始保持一條好靚嘅上升軌，每次高位都高過上次高位，每次低位亦都高過上次低位，走勢咁強唔知有乜根據，照計公司中期賺多18%唔算標青，計落今年預測PE都30倍過外，但有時強勢股升到頂位時至會揭開謎底，散戶先明白：「哦，原來係咁！」到時就係散貨期。

ERP市場大有潛力

金蝶係做企業管理軟件（ERP），主要對手係用友軟件，最近神州數碼（00861）同台灣鼎新電腦合作有意加入爭奪市場，浪潮（00596）亦要爭中小企軟件飯碗。

ERP個孖屐好大兼好有潛力，尤其係今年祖國人工同原材料成本急速上漲，令到中小企自動化需求同步提升。

金蝶今年搞咗3G網絡流動管理ERP軟件，以提高競爭力，可能全年成績表會畀大家一個驚喜。強勢股總有強勢嘅原因，隻股睇嚟仲有上升空間，定好止蝕位博佢愈炒愈高。

戰報

鉑陽太陽能（00566）+9%

高仁尋日推介的鉑陽無懼跌市，股價更以全日高位0.71元收市，以低位計單日升逾9%。

卜蜂國際（00043）+18%

古晨周一建議投機買入卜蜂，昨股價一度升上1.18元高位，以推介當日低位1元計，升幅18%。

古勝