近排筆者收到朋友送畀我嘅吳宇森導演成名作《英雄本色》（以高清版推出）。睇完後，覺得「英雄」確係有本色。
今日講「『英皇』本色，三雄出擊」，唔使講梗係講「英皇系」啦！筆者曾經喺本欄寫過英皇鐘錶（00887），到上周五已升咗56%（1.17元），當時寫嘅落墨點係LV同英皇鐘錶呢個品牌嘅「夢的延續」，加上內需同祖國靈光護蔭之下，今日光輝嘅成績，繼續放長線釣大魚啦！
大家都知今年個市一飛上差唔多25,000點，依家開始回調，有一個金融界嘅COO同我講，個市起動都係呢幾個星期，又係真喎！一眾金融證券都受惠成交飛升而向上爬，依家係唔係都過千億元成交，加上確定美國放水，證券股又點會唔得，英皇證券（00717）已經擺定位，見到好多內地機構頻頻喺香港搞資產管理業務，但又唔係識搞，買係最好嘅方法，睇吓海通同大福就知道。有品牌又有策略嘅證券行開價梗係高，股價自然會適度調整啦！收到未？
至於英皇國際（00163），一早已向香港嘅磚頭進發，西環同北角嘅豪宅銷情理想，最緊要係受惠於地產市道熱錢流入，只要地產市場喺政府策略不能影響之下（其實都幾難），都係要睇好。英皇國際昨日收報1.97元，從圖表睇，新嘅牛市形態喺英皇國際身上初現，目標價2.5元，繼續追蹤。
英皇系回應內地「好安達」嘅需求，包括金融服務、黃金手錶、地產，全部都係「英皇系」嘅價值鏈可以一手接晒，所以要留意「英皇」本色，睇住佢呢三雄嘅發展，三雄都一齊有飛升嘅意境，睇實啊！
香港大學電子金融服務榮譽助理教授 徐燦傑