絲絲講場：中移社區活動贊助學生捧港足
中移（00941）喺九七年來港上市至今，已經有13年咁耐，佢哋一直畀人嘅感覺，都係一家「好中國」嘅企業，即使喺前幾年收購香港嘅萬眾電話，喺香港都冇乜嘢大宣傳。其實中移喺內地除咗客戶多、盈利多，集團一直都好注重社區活動，既可幫到人，又可提升企業形象。
大學生參觀服務中心
中移尋日終於為香港人搞咗第一次社區活動，話說今年香港足球隊喺亞運嘅表現相當出色，更加闖進十六強，中移決定與香港幾家大學合作，搞咗一個名為「激情亞運，體驗移動」嘅活動，贊助一批大學生由香港到廣州為港隊打氣，雖然港隊尋日落敗，但相信一班大學生能夠親自入場為港隊打氣以及感受亞運氣氛，都係一次好難得嘅經驗，聽講佢哋仲會喺廣州住一晚，明日中移仲會開放集團喺廣州嘅客戶服務中心畀班大學生參觀添。
雖然今次活動籌備時間好趕，但反應相當熱烈，相信以後中移會喺香港搞更多社區活動。
余絲韻