股市真係一個創造財富嘅好地方，正如內地嘅創業板，每隻股票一上市就好似撻着摩打係咁升，做老細嘅身家就自然水漲船高，依家創業板差唔多玩咗一年，喺135家上市公司中，身家達到10億元（人民幣‧下同）以上嘅就已經有92個股東，其中一人嘅身家更加超過100億元，而南都電源嘅趙亦斕就係最年輕嘅富豪，佢嘅年齡只有32歲。
創業板富豪榜排第一嘅係智飛生物大股東蔣仁生家族，身家有104億元，向日葵光能董事長吳建龍以82億元屈居第二。上榜富豪平均年齡好後生，平均只有46歲。
至於從事電池行業嘅南都電源周慶質及趙亦斕夫婦，佢哋嘅身家總共有27億元，排名第17位，其中趙亦斕只有32歲，就已經成為億萬富翁。雖然依家佢哋呢班創業板股東個個嘅身家都係天文數字，不過胡潤就話，一旦佢哋開始減持創業板股票，好可能會影響到創業板嘅高市盈率，意味着到時呢班富豪嘅身家可能會縮水。
余絲韻