絲絲講場：招行猛人仲躋偉投支付寶
呢幾年招行（03968）嘅信用卡業務搞得有聲有色，全靠行長馬蔚華當年頂住壓力，夠膽開出百萬元年薪嘅優厚條件，挖走台灣中信銀行嘅高級副總裁仲躋偉。一直想涉足銀行業嘅阿里巴巴（01688）主席馬雲，已成功將仲躋偉羅致到支付寶做高級經理嘞！
招行信用卡前軍師
仲躋偉喺台灣銀行界打滾咗廿年，先後喺運通、花旗及台灣中信做過，仲將台灣中信打造為全台最大發卡行。招行早年野心勃勃要搞好信用卡，○四年將仲躋偉撬走，佢唔使兩年就將台灣全套推廣信用卡嘅策略搬到大陸，仲發揮得淋漓盡致。
仲躋偉係招行第一個「外援」，馬蔚華力排眾議，以高過所有主管人工嘅百萬元年薪禮聘仲氏。仲躋偉就用咗4年時間，協助招行信用卡發行量衝破2,300萬張，僅次於工行，咪話唔犀利。
今年初仲躋偉喺招行退下火線，原來係馬雲搵到佢幫手，今後支付寶嘅資金流業務會由佢負責。唔知佢哋兩個合作，可唔可以打通阿里嘅任督二脈呢？阿里尋日宣布收購咗中國出口服務供應商──深圳市一達通，係公司一年內第5項收購，但就冇講用咗幾多錢。
余絲韻