全世界為官者，都會好避忌直接投資股票，以免瓜田李下。絲絲最近喺《彭博商業周刊》（Bloomberg BusinessWeek）睇到一篇有趣報道，話美國財長蓋特納唔單只繼承咗老爸剩落嘅幾手IBM股票，仲揸咗一間叫Lululemon Athletica嘅加拿大高級瑜伽服裝零售集團嘅公司股票，淨係今年股價都升咗六成，估唔到佢嘅投資眼光都拍得住「股神」。
點解佢要揸呢間公司嘅股票？報道就解畫話，原來蓋特納讀緊大學嘅愛女，好鍾意做瑜伽，成日幫襯Lululemon，咁咪順手買佢哋嘅股票囉。
Lululemon由○七年七月上市至今，股價足足升咗一倍半，同期嘅標普500指數仲要倒跌兩成，就算只計今年初到依家，呢隻Lululemon都升咗差唔多六成，你都咪話唔勁。至於蓋特納喺幾時買入呢隻股票，報道就冇詳細列明。
除咗銷售瑜伽服裝之外，Lululemon最出名就係好受都市女性歡迎嘅潮流循環再用購物袋嘞，呢啲購物袋特別在個袋面上印咗啲值得令人細味嘅字句，例如係「金錢都不及朋友重要」（Friends are more important than money）。但絲絲就相信有一句係蓋特納應該唔多想聽，就係「每日做一件令你驚嚇的事」（Do one thing a day that scares you），點解？金融海嘯、QE2以至貨幣戰爭已搞到佢老哥周身蟻，如果日日都嚟單驚嚇嘢，咁就真係有得震冇得瞓喇。
余絲韻