市場熱線：中鐵生意長做長有

尋日祖國期貨市場個別發展，鋅、橡膠、大豆、乙稀、棉花、白糖繼續跌，但玉米回升。A股最尾一粒鐘奇迹反彈，滬綜指重上3,014點收市，高低位波幅達2.65%，主要靠錢莊股發威，工行A股升咗6.84%，但工行H股（01398）卻跌1.82%。

新股表現不如前

港股仍係金屬能源類最衰，同車股一樣都係升得多、跌得多，百麗（01880）有大行唱好逆市上升，但零售股慢慢由高位回落，中國海關突然要向5,000蚊以上嘅奢侈品收稅，班個人遊掃貨黨肯定會好掃興；但香港嘅日用品售價又平過祖國大城市，另一班掃貨黨集中喺藥房、超市出擊。到出年，海南島搞免稅國際旅遊島，台灣亦開放陸客個人遊，香港會遇到競爭。

呢排孖屐氣氛唔好，影響到新股，理士（00842）同泓淋（01087）今日登場，暗盤雙雙破底。今日截飛嘅「超購王」嘅好孩子（01086）仍見踴躍，下禮拜三掛牌有得升先係good boy，但古勝認為用孖展抽唔會有乜肉食。

最令人擔心都係現代牧業（01117），出年預測PE達62至80倍，點解咁值錢令人難明；香港上市4隻奶股冇厘力氣，但上市冇耐嘅環球乳業（01007）本周末會帶記者、分析員同投資者去哈爾濱睇廠，可以留意有冇異動。

在下呢排亦偏向揀啲穩陣股，希望捱過個調整浪，基建股畀中鐵建（01186）累街坊，「三寶」中得中鐵（00390）仍然高過上月中嘅升前水平。中鐵建杜拜蝕40億單嘢近來內地傳媒紛紛爆料，「揩嘢」原因同中國與其他國家文化唔同有關，祖國搞基建有阿爺幫手樣樣開綠燈，但喺外國就好難跟上「中國速度」。中鐵建有冇得賠未知，不過單嘢凸顯咗基建股海外業務嘅風險。

基建踏入高峰期

同中鐵建業務好類似嘅中鐵，呢次受連累雖然唔能夠置身事外，但暫時睇屬個別事件。中鐵前排派咗第三季成績表依然對辦，第三季賺多16.6%，今年頭九個月接單多37%，今年開始係基建同鐵路建造高峰期，所以公司自然豐收，但其實祖國未來好多城市會起地鐵，中鐵喺地鐵嘅市場份額高過中鐵建好多，生意長做長有。

另外，《經濟觀察報》報道，中鐵搞緊重組，計劃喺北京、上海同廣州分成3間子公司，目的係喺長三角同珠三角搶生意。中鐵趁呢次「無妄之災」係低吸時機，長線有揸拿。

戰報

北京御生堂（01141）+10%

帥哥尋日指北京御生堂醞釀炒上，昨日逆市做好，以低位0.36元計，單日升幅近一成。

第一視頻（00082）+8%

古晨上周五建議短炒隻第一視頻，股價昨日逆市高見2.5元，較推介當日低位2.3元升逾8%。

古勝