好多人成日都話市回，一回起碼一千、二千、五千點，周圍都有人同你講，阿爺又一次發揮佢「仁愛的手」，抽起銀根凍資3,500億元人民幣，呢個行動又再一次令到短期加息機會降低，阿爺又再一次發揮大國本色，好嘢！
一早講咗喺回調市，繼續「炒股唔炒市」，有個老友早兩日「勇字當頭」喺極高位買建行（00939），依家個心「赤住赤住」，如果大家有留意建行嘅歷史高位8.8元，打一個折頭，去到呢啲歷史性水位，都要做吓樣回調吓啦，繼續守望我嘅朋友再一次用更「中長線」心情去睇住建行。
回調市，最好係繼續留意不受大戶所舞弄嘅非指數股，睇埋佢哋唔同嘅激發點，例如概念、現金流等等，自然可以又炒多一轉，記住，價格係要耐心等待嘅。
藥業股呢排又有追落後嘅感覺，朗生醫藥（00503）終於重拾動力，收咗貨咁耐可以繼續留意；至於四環醫藥（00460），筆者覺得依家大家都係等佢爆，但走勢上繼續橫行，都係要咬實，有概念嘅長途伴侶，表現無理由咁弱，又係一場耐性戰嘅開始。
半新股，繼續追蹤美即（01633）同永暉（01733），因為喺回調市嘅時候，半新股又成為大眾最愛嘅甜品，點可以放棄。記住，唔好亂估個市回幾多，又或者市升幾多，只有順勢而行，方為上策，唔係又會好似我認識嘅股評家朋友一樣，輸到「體無完膚」。忍着淚說Goodbye冇幾耐，股市又一次伴你啟航咁就得喇！
香港大學電子金融服務榮譽助理教授 徐燦傑