上個月尾中國社科院先至出報告，話要四十年後中國先至會超越歐盟，成為世界第二大經濟體，僅僅屈居美國之下。但相隔十幾日，同社科院差唔多分量嘅美國經濟諮商局就喺《華爾街日報》發表言論，話二○一二年中國就可以超越美國，變成世界第一大經濟體！咁快？
諮商局引用數據，話美國經濟規模約15萬億美元，是中國三倍，就算美國經濟走下坡，中國經濟保持強勁增長，都要逾十年先至會畀中國追過。不過，如果計埋「購買力平價」（purchasing power parity），中國後年就可追過美國。乜嘢係購買力平價？簡單嚟講，同一件貨品，中國境內買會較喺美國境內買便宜，咁同一舊錢喺中國就可以有較大嘅購買力。
諮詢會咁辛苦引用呢個咁古典嘅購買力理論，都要將中國推做世界第一。火藥味好重嘅G20峰會已經開始，份報告喺咁敏感時間公布，會唔會係有陰謀呢？《華爾街日報》就分析，呢招可能是「轉移視線大法」，以免G20成員淨係責怪美國印銀紙推QE2，推高晒通脹，都希望成員國鼓勵中國承擔更多大國嘅責任。
余絲韻