絲絲講場：新百貨博客online擺靚仔靚女陣
現時青年人喜歡寫博客、玩社交網及網上購物，新世界百貨（00825）為咗追上潮流，想同網友打成一片，開咗一個名為「互動新百貨」博客，尋日隆重登場，仲特意請咗內地四位靚仔靚女嚟香港，參加呢個博客既開幕儀式。
喺香港玩足三日
呢四位係「第一屆新世界百貨形象代言人」冠亞軍嘅得獎者，舊年由內地網民及評判精挑細選出來，佢哋會喺香港玩足三日，之後仲會將自己暢遊香港嘅經歷放喺博客同網友分享。其中一位代言人庄文話，佢已係第二次來港玩，今次會集中購物，佢已經去過旺角、尖沙咀瘋狂shopping，咁過癮嘅經驗當然會放上博客，同其他人分享。
絲絲了解過，呢個網站有齊新世界百貨最新嘅優惠同購物指南，又有生活資訊同潮流訊息，仲有一個「代言人地帶」，報告代言人嘅行蹤同佢哋嘅照片，簡直係貼身追蹤。新世界百貨執行董事鄭志剛話，依家社交網站好流行，希望利用微博同博客嘅網上平台，同網友交流同分享，又話新世界百貨微博開咗唔夠一個月，已吸引好多粉絲，可見社交網嘅宣傳威力好強勁。
余絲韻