吉利控股買咗富豪汽車都一段日子，唔少人都關心佢哋磨合成點，吉控董事長李書福就喺上海一個論壇度話，有啲地方有少少分歧，好似富豪就唔想造啲太大架嘅車，用油多唔環保，泊車都要劃大啲個位，相反李書福就話唔理咁多，有人買就得啦。
雖然大家諗法唔同，不過李書福話可以慢慢協調，會尊重富豪嘅核心價值，就算最後真係傾唔掂數，都可以透過民主嘅方法解決。
對於之前富豪計劃嚟成都、上海同埋大慶設廠，李書福就大耍太極，仲話設廠呢樣嘢冇人揸到弗。佢話就算吉利想，富豪又未必想；到咗富豪想，中央又未必批，嘩！咁即係想定唔想？
其實富豪已講明中國係佢哋嘅第二個市場，咁富豪嘅第一本土市場喺邊？咪就係富豪嘅發源地瑞典囉，佢哋位瑞典國王近期都嚟咗杭州，同吉控班管理層傾吓偈，了解吓富豪嘅近況添。
余絲韻