市場熱線：維達買得有道理

花旗魚缸隔晚可以倒升，足證「趁低吸納」力量幾強大，美匯指數曾經上過78，依家係好淡爭持格，未知邊個手瓜硬，古勝始終認為熱錢力量不可擋，股市略為抖一個禮拜之後，下個禮拜又可繼續瘋癲。港股尋日成交又過1,200億元，淨係窩輪都超過200億元，友邦（01299）收市後納入MSCI指數，成交146億元兼股價創新高。

輪到油股發威

雖然有評論認為加咗存款準備金率，今年再加息嘅機會降低，但平保（02318）仍升4.7%創新高；三大石油股幾神勇，「石化雙雄」喺A股幾乎漲停板，皆因祖國鬧柴油荒，所以未來會御准擴大產能。國美（00493）兩大陣營爭拗有突破性進展，雙方決定「和氣生財」，股價創咗兩年幾新高，但樓市差會拖累電器銷售，所以應該趁高食胡。

好孩子（01086）尋日開始招股，唔使問都知熱爆，以上限定價計，今、明兩年預測PE分別係25倍同16倍，睇落幾吸引，不過6成幾收入喺歐美，即係大半隻ODM股，內銷只佔24%，估值其實一啲都唔低，又有原材料同人仔升值壓力，但短炒冇話唔得。

講番祖國經濟數據，除咗零售總額之外，CPI、PPI、新增貸款樣樣超過預期。CPI咁高又係食品類上漲10.1%所帶動，今個月又有服裝加價。古勝記得○七、○八年食品同汽油狂加價嘅時候，好多國家爆發暴動示威，人仔呢排自動自覺升值，可能都係為咗降低「輸入性通脹」。

通脹都有唔少受惠股，磚頭、股票、金鑽、零售有買趁手，能夠將成本轉嫁畀消費者嘅亦無懼通脹，服裝加價可以買少啲，但日用品唔慳得，廁紙就係其一，所以維達（03331）繼續長升長有，九月底升到11蚊之後，呢個幾月處於整固期，但每次跌穿10蚊都好快反彈，尋日回升6%收報10.78元，破咗個下降軌，睇落應該完成整固重見升浪。

朝多元化發展

講起維達，不期然想起另一「內需王」恒安（01044），其實呢兩隻股愈來愈似。維達做廁紙同紙巾之餘，亦想做埋衞生巾同紙尿褲，跟恒安搶生意。當然，祖國市場咁大，利用品牌優勢多元化發展係正常策略。

維達今年上半年成績表靚爆鏡，收入增長25%，毛利率不跌反升，開工率100%，所以未來會繼續擴產，管理層亦預期收入增長同毛利率唔差得過上半年。好股自然較貴，如果依家唔出名嘅內需股都炒到20倍PE以上，在下反而覺得維達仲抵買。

戰報

國美電器（00493）+32%

高仁上周四指國美估值吸引，昨股價急升，高見3.38元，較推介當日低位2.55元升32%。

朗生醫藥（00503）+12%

帥哥本周三指朗生收集完成，當日低位4.09元，昨日股價一度升上4.59元，短短兩日已升12%。

古勝