何謂做好行政總裁（CEO）呢份工？除咗講求領導才能及辦事能力外，原來仲要得民心。由《財富》雜誌舉辦嘅年度最佳CEO選舉，福特汽車CEO穆拉利就打低一眾對手，包括亞馬遜嘅貝索斯、facebook嘅朱克伯格、印度塔塔集團嘅拉坦‧塔塔以至「股神」巴菲特，喺讀者票選部分高票當選，先拔頭籌。
今次選舉以淘汰賽形式進行，穆拉利一路過關斬將，終於喺決賽遇上被視為勁敵嘅蘋果公司「教主」喬布斯，不過雖然喬布斯「教徒」眾多，但穆拉利仍成功取得高達94%選票，以壓倒性姿態登上讀者票選部分嘅王者寶座。不過，讀者票選部分只係年度最佳CEO選舉準則之一，《財富》雜誌將參考其他資料，並喺本月十八日公布最後結果。
要成為讀者心目中嘅No.1殊不簡單，但睇番穆拉利喺○六年上任CEO後，福特不但扭虧為盈，公司股價更由每股1.8美元回升至現時嘅近16美元，佢哋更係美國三大車廠中，唯一毋須政府打救嘅車廠，可見穆拉利絕對係實至名歸。
余絲韻