美國再推量化寬鬆（QE2）搞到好多國家怨聲四起，個個都驚通脹，就連絲絲都四周圍問人有乜嘢抗通脹嘅投資。尋日絲絲與中國生命（08296）主席劉添財食飯，劉總話佢哋本月底會喺香港推出首項規劃善終服務，喺生前可安排自己嘅身後事，免得煩到屋企人，咁當然要畀咗錢先喇，而呢項名為「圓滿人生」生命契約服務，劃一價係四萬八，喺推廣期間有折扣，只收四萬二，更重要係若大家喺30歲時已買咗呢份契約，到99歲先過身，到時亦絕不加價，絕對係抗通脹嘅投資。
呢份契約仲可以轉名，即係話你買咗都可以轉畀其他人，夠晒彈性。劉總又話，佢哋收到嘅錢唔會投資其他高風險項目，只會喺本地投資保本產品。唔講唔知，生命契約喺好多香港以外嘅地方如美國、日本及台灣等都好流行，其中美國嘅普及率更高達90%！不過香港之前就未有呢項服務提供，席上唔少行家都頗有興趣，中國生命喺月底會推廣告宣傳，有興趣不妨留意一下。
余絲韻