近期熱錢氾濫，股市狂升，有「金牌莊家」之稱嘅立法會議員詹培忠講股又有金句，引用「戴綠帽」理論妙喻炒股。佢話吼中咗一隻股票後，就要瞌埋眼由得佢升，相反若買錯咗一隻股票，就要識得止蝕，正如「綠帽唔怕戴，最緊要除得快」！「金句王」真係非佢莫屬。
有立法會「賭王」之稱嘅詹培忠，成日揶揄港股係另類賭場，佢對炒股票自然有其一番獨特見解。佢話近年都有投資吓滙控（00005），喺40蚊左右買入，50幾蚊就走咗。但佢一啲都冇後悔喎，好似今次大升市，滙控完全係大落後，佢笑話「大笨象」走樣喇。
咁佢玩百家樂咁叻，有冇心得可以傳授呢？佢直言百家樂係人性遊戲，仲提出「六句真言」﹕「贏要谷、輸要縮、心要清、數要熟、人要毒、要知足。」大家領悟到嗎？不過佢都補充一句，最好唔好賭！
詹培忠依家手上有6隻上市公司「殼」，佢最睇好資源類，喺唔少地方有礦，例如非洲馬達加斯加等，一向牙擦嘅佢，話自己踢波可以攞冠軍，做經紀可以做到「金牌莊家」，矢言今次要做「礦王」！
余絲韻