距離二○一二年立法會選舉雖然仲有兩年時間，但選戰已備受各界關注，其中立法會金融服務界議員詹培忠曾多次話佢自己兩年後肯定唔會再參選，咁佢呢個位邊個會虎視眈眈呢？
市場估計，如果詹議員真係退出唔玩，最少有6名人士唔排除有興趣爭取補上，包括張華峰、馮志堅、胡經昌，朱李月華及李君豪等，到時出現一輪大混戰並唔出奇！
先講張華峰、馮志堅及胡經昌，佢哋3位曾經選過立法會，其中胡經昌更加做過議員，亦對立法會議員事務好上心及勤力，估計呢3位人士有興趣亦唔算意外。
至於金利豐證券老闆娘朱李月華，佢近年喺股壇頗為活躍，包括中策（00235）等嘅多隻矚目股份，金利豐都有份包銷，並打響名堂，今年初更傳出金利豐會上市。
李君豪係已故政商名人李東海之子，又係港交所（00388）董事，早年已傳佢有興趣從政，不過佢每次都回應話要幫家族做嘢，例牌否認對立法會選舉有興趣。
其實依家距離選舉仲有兩年，可以出現好多變數，詹議員會唔會改變主意？又或者係期間會否再爆出其他有興趣人選，真係冇人知，但選情激烈嘅味道就肯定已經聞到！
余絲韻