期指觀瀾：24400樓下建好倉
連升六日的港股終於要抖抖，地產股頻伸手，恒隆地產（00101）批完輪到信置（00083），擔心陸續有來，加埋內銀股供股權即將出籠，唔少唔準備參與供股的基金及策略股東都掟正股套戥，加速了港股調整，恒指跌253點報24,710點。大市成交額有1,166.9億元，多少可反映大市雖跌，入市熱錢依然唔少的事實。
期指走勢都算蠱惑，早市跌穿周一在24,700點，開市一小時倒升，重返24,900點樓上，當市場以為周一先跌後升市況重演，午市前後支持力全失，收市更低於24,700點，技術走勢麻麻。
資金市到底可維持幾耐？無人知，值得留意QE2的威力在股市繼續炒作，惟匯市已消化得八八九九，美匯近日在76水平有喘定迹象，港股會否出現整固，似乎睇美匯會有一定預示功能。
十一月短短幾個交易日，留低三個上升裂口，23,366、24,345及24,732，昨日基本已補回24,550至24,732點的裂口，回補24,345點的機會唔細，期指如果調整到24,400樓下，開始進入「射程範圍」，筆者會再開好倉。
John Mullen