市場熱線：四環跟大戶收集

美元走弱利資源股

高追一路有甜頭嘅得資源股，純粹基於美元偏弱呢個概念就長升長有，連話徵收資源稅嘅煤炭股亦反覆試新高。不過，煤股好亦等於電力股同鋼鐵股差；同樣道理，資源價升不利工業股，股仔湧晒去開礦，但邊有咁多礦買？賣得畀你都唔荒好嘢。

本地魚缸上禮拜五成交1,338億元，扣咗斑點狗（00101）抽水百億，其實同再上個交易日差唔多，恒指再升341點，即月期指低水87點。

日本同歐洲議息之後冇跟住老美癲，老美喺呢場話事啤遊戲成為唯一玩家，但美歐日有排都唔會加息，其他國家就係咁加，古勝斷估祖國呢個月都會加一次息，所以零售股呢排都比較呆滯，尤其係班體育用品股。滬綜指繼續升到3,129點，距離3,200點嘅關鍵位唔遠，隻A50基金（02823）嘅溢價開始收窄。

最神奇嘅股肯定係其士泛亞（00508），由7毫插到落兩毫幾，上禮拜五急升到4毫之後拉閘唔知搞邊科，依家大隻佬都非常好炒，唔使博呢類股仔。半新股亦係不錯嘅選擇，好多時見「保母」或基金喺孖屐增持，例如賽晶（00580）、麗悅（02266）同環乳（01007）都喺低位大幅反彈。

隻四環醫藥（00460）招股時反應好好，點知上市後就靜蠅蠅，掛牌共7日，低位5.55元，高位6.1元，上周五收報5.78元，比招股價僅升25.6%。炒新股嘅股民一向短線居多，一見冇動靜就會轉炒第二隻，所以貨源歸邊嘅速度特別快，四環到儲夠貨可能就會發圍。

盈利增長幅度驚人

當然，呢排藥業股整體亦好似食咗成擔豬油咁，同第三季坐火箭冇得比。不過，藥股始終喺內需股中佔好重要嘅一席位，市場輪流炒不可缺少。四環嘅PE超過30倍，亦可能令孖屐有戒心，但藥股好難有指標，好似隻中藥（01093）長期PE得幾倍。

四環係祖國最大心腦血管藥物製造商，舊年賺3.14億元人仔，按年升34.4%，市佔率約7%；今年上半年更多賺1.23倍，至2.47億元人仔，毛利率升至73.2%。以每年盈利增長超過3成計數，佢嘅估值唔算貴。

戰報

中國南車（01766）+13.5%

桃桃上周四建議順勢追入南車，當日低位8.61元，上周五股價創9.78元新高，升幅達13.5%。

中國木業（00269）+12%

古晨上周三推介的中國木業，周五高見0.136元，以推介當日低位0.121元計，累積升幅12%。

古勝