成日同人講，真係「估你唔到」，上個星期全世界睇淡。一個好嘅數據加上「放水在望」，又一次「股市沖天飛」！一早講咗，加息中嘅阿爺喺市場太熱，需要搵部小涼伴嚟「涼一涼」，其實經濟勢頭不變，所以繼續為阿爺喝采，勁！
早排喺本欄推介嘅TCL通訊（02618）、I.T（00999）同華耐（01020）都戰績凌厲，好多朋友因為賺錢請我食飯，食到我又要開始「護住」自己身形。記住，內需係筆者今季嘅主題，喺呢個主題下搵股勝算較高，千祈唔好以為「市升股升」，一隻好股先至可以同你「共同度過」，邁向Eason金曲《每一個明天》。
有潛質嘅新股，例如四環（00460）、友邦（01299）都要跟蹤，因為盤路正確，概念又夠強，不過講快，四環會快啲，因為「價細易舞動」，友邦就肯定係各大指數嘅「明日之星」，擺喺度「放長線，釣大魚」適合啲。
有朋友電郵給我話個市咁高，問我應唔應該入市，我就話有賺嘅可以鎖定一部分錢，剩番可以透過買期權或者窩輪作最後衝刺。不過，因為市場波動性較大，買價內證會相對划算，起碼「引伸」呢樣嘢影響較細，容易推算後市攻略。行使價方面，用一啲歷史性支持位作為根據點會比較好，唔好貪得意亂揀。
「放水」已經係不爭的事實，無論多少都會有多餘嘅水分喺個市場上面，肯定嘅係亞太區股票市場一定係其中一個贏家。放水之後，有一個叫做「半年效應」，市場一般會喺半年後再度飛升，加上港交所（00388）的一連串策略行動，衝！
記住喺乘風破浪嘅同時，一定要有極強嘅風險管理意識，資產泡沫肯定無可厚非，不過飲啤酒無泡又邊度好飲，最緊要係保持頭腦清醒，時刻警覺，收到未啊？
香港大學電子金融服務榮譽助理教授 徐燦傑