絲絲講場：國泰運通合作推聯營公司卡
簽帳額可以變為現金或獎品，係好多人用信用卡消費嘅原因，絲絲有唔少老友係儲「亞洲萬里積分」嘅狂熱分子，平時諗盡計仔儲里數，用嚟換機票周圍飛不知幾寫意。國泰（00293）尋日就宣布與美國運通合作，將亞洲萬里積分計劃擴展至企業客戶。
賺里數省商務開支
國泰常客計劃總經理盧家培話，查實獎賞計劃唔只機票，由酒店食肆以至兒童用品都有，不過佢都鍾意換機票，唔係自己去遊埠，而係畀工人返鄉下，等佢可以有個舒適嘅旅程。佢話依家除咗個人，香港企業都可以儲到飛行里數，因為國泰與美國運通合作推出咗聯營公司卡。
中環老友好多時要周圍飛兼且多應酬，平日好多時簽卡，國泰與美國運通新推出嘅聯營公司卡就令到老友簽帳賺里數之餘，公司都可以同時賺到里數，令企業可節省費用，而且亦可以上網Check住各項商務開支。
余絲韻