絲絲講場：華誼「解禁」名人股東疑掟貨
本周一係深圳創業板首批上市公司限售股解禁嘅大日子，雖然最終都冇出現市場預期嘅「套現潮」，不過睇番深交所嘅紀錄，原來有4家公司嘅9名心急股東，喺股份解禁第一日就沽貨套利，其中被稱為「中國娛樂第一股」嘅華誼兄弟，就分別畀人減持咗200萬股及50萬股，合共套現逾7,500萬元（人民幣‧下同）。
黃曉明持股值逾億
睇番華誼兄弟嘅豪華股東陣容，真係位位都係商界及娛樂界巨星，包括大家好熟悉嘅黃曉明、馮小剛及馬雲等，雖然到依家仍未有人企出嚟承認自己減持咗股票，不過絲絲查過資料，原來揸住超過200萬股嘅股東只有14位，以上提及嘅3人都有「嫌疑」。
其實計絲絲話，華誼兄弟上市後股價係咁升，所有股東都已經賺到盆滿缽滿，好似黃曉明咁，佢之前用540萬元買入嘅股票，依家市值已超過一億元，投資回報最少都有20倍，其他更早入股嘅，投資回報更超過100倍，作為一項投資，適當咁沽出一部分收番啲資金都好合理。
余絲韻