近期收到唔少朋友畀我嘅email，都係一啲鼓勵同支持，當然好多朋友因為喺股海淘金之後請我食飯。坦白講，只要你肯努力，你都會成為一個股神。
言歸正傳，近期繼續向內需股進發，留意緊美即控股（01633），其實美即係中國面膜行業嘅「大佬」。公司最主要喺中國從事面膜同其他護膚產品的研發、生產、銷售同市場推廣，為一站式美容連鎖店鋪路。睇到公司主要專注於面膜產品業務，仲提供好多有不同特色嘅面膜產品，以迎合唔同皮膚種類同中國消費者嘅需要，佢哋係從消費者角度出發，思維正確！
公司旗下所有產品都透過中國完善嘅分銷商同零售商網絡出售，現時總共有3,330個銷售點。公司嘅所有業務以中國為基地，而中國係全球經濟增長最快國家之一，以消費品零售額複合年增長率達18.5%，加上國策配合。同時，貪靚嘅中國姊妹梗係繼續貪靚，中國護膚品銷售額嘅複合年增長率達31.6%，已超越中國消費品嘅零售額複合年增長率19.7%，係中國消費品同護膚品行業嘅零售額升幅之冠。人有錢，對外觀消費增長自然強勁。
筆者從三維分析，美即會向以下方向發展：一、擴大和優化公司的銷售渠道；二、增強公司的產品開發實力；三、增加公司的產能。美即近期以「放風箏」之勢飛升，內需加有概念，仲係「市場大佬」，再加上佢嘅業務概念獨特，中線睇反覆向上。中國「十二五」規劃建議聚焦十大重點，當中以擴大內需為主，都係嗰句啦！繼續追蹤！
香港大學電子金融服務榮譽助理教授 徐燦傑