絲絲講場：新地年報標註權益爭議
新地（00016）非執行董事郭炳湘「捍衞」佢喺家族基金中權益嘅事件，成為城中熱話，新地尋日出咗今年六月止嘅○九年年報，絲絲發現年報都有提及呢單嘢，但就與往年有啲唔同，雖然仍舊話呢批約10.65億股新地嘅家族基金股份，新地視作郭老太鄺肖卿及郭氏三兄弟嘅權益，但另外有近1609萬股新地，就講明冇郭炳湘份。
郭炳湘申報原文照搬
年報又提到，早前郭炳湘知會新地，話佢並不察覺任何情況，導致佢名下1,174.38萬股新地被轉讓或終止，並原文照搬郭炳湘申報嘅原有權益，並註明郭炳湘涉及該十億幾股新地及107萬股新意網（08008）正在爭議中。至於十月初關於家族基金重組事宜，相信就因為唔喺業績期內，年報未有提及。
期內新地開咗4次董事會議，作為非執董嘅郭炳湘出席咗3次，比起○八年更勤力，佢嘅非執董袍金就冇加到，都係13萬元；而兩位做執董嘅細佬郭炳江及郭炳聯就加咗唔夠5%，都只係二百幾萬元。
另方面，新地與新加坡嘉德置地合作發展嘅新加坡地標ION Orchard，舉行咗觀景台ION Sky預覽儀式，郭炳聯就親身飛去飲香檳，同場嘉賓仲有名模戴文青木及台灣演員吳建豪。
余絲韻