比亞迪（01211）業績差引發基金大洗倉，股價兩日跌咗18%，尋日先至微升番2.3%，老闆王傳福嘅身家自然大縮水。根據《福布斯》尋日公布嘅「2010中國富豪排行榜」，王傳福已由去年排名榜首跌到落第10位，取代佢成為今年中國首富嘅，就係娃哈哈集團董事長宗慶后。呢個榜應該喺「事發前」完成，如果比亞迪股價爬唔番上去，睇怕王傳福明年可能跌出十大，佢近期諸事不順，真係要度吓橋。
宗慶后喺胡潤以及福布斯嘅富豪榜都係最有錢嗰個，但福布斯公布佢嘅身家有80億美元，計番人仔就比胡潤榜公布少咗33%。坐第二把交椅嘅係百度董事長李彥宏，身家有72億美元，福布斯計嘅反而比胡潤多咗33.6%；福布斯富豪榜排第三嘅係三一重工董事長梁穩根，身家與胡潤榜計出嚟嘅都差唔多。
睇番福布斯公布內地最有錢嘅400名富豪，佢哋嘅財富總值由去年嘅3,140億美元，激增34.7%至4,230億美元；上榜嘅富豪身家至少有4.25億美元，比去年只要3億美元就入榜難咗好多。擁有10億美元以上嘅內地富豪，今年增至128人，喺全球僅次於美國，唔怪得福布斯形容中國係財富大爆炸喇！
內地十大富豪中，唯一女性係排第八嘅龍湖地產（00960）董事長吳亞軍，身家達47億美元。喺胡潤榜高踞第三位嘅玖龍紙業（02689）董事長張茵，福布斯計出嚟就只排第33位，兩者落差相當大。
余絲韻