市場熱線：神華有力急起直追

強勢股見大幅回吐

港股尋日靠晒祖國金融股撐住，中行（03988）同平保（02318）成績表一好一差但都有得升，中行、交行（03328）同工行（01398）頭三季嘅盈利增長都係27%至28%，同四叔「三胞孫」咁一致。不過，其他大部分都「見光死」，好似利信達（00738）、謝瑞麟（00417）同亨泰（00197）等，零售股業績冇錯係好對辦，但股價經已倍數上升，盈利追唔上股價嘅升幅；I.T（00999）收市後公布上半年度賺多1.4倍，但計落預測PE都成30倍。

本地魚缸尋日其實好有反彈條件，美股隔晚跌幅低過預期、美金回軟、歐股上升，唯一失望嘅係A股，滬綜指幾次升到3,000點就沽返落去，恒指則三番四次倒跌後即刻反彈，恒指一日大跌就將升勢盡破壞，好多人又講起「秋官效應」，古勝唔信呢類旁門左道，但強勢股如汽車、零售、港交所（00388）等大幅回吐係不爭事實。

人仔再跌多日，「十‧一」長假期後嘅升幅已全部報銷。雖然祖國喺人仔匯價企得好硬，但用稀土來做談判籌碼未必行得通，日本已拿拿臨搵印度做供應商，據稱「無印良品」同「UNIQLO」等日商已諗緊將代工搬去東南亞，唔知對申洲（02313）呢類代工廠有幾大影響？

四環（00460）首日升25%算合格，友邦（01299）暗盤有幾個巴仙執不能苛求，隻股認購大戶熱、散戶冷，有機會成為另一隻農行（01288）。

資源股亦係回軟，但主要係美金「死貓彈」啫，唔算乜嘢特別，長線仍係可以睇好，因為無論老美用「唧牙膏」或「All In」式推量化寬鬆，都離唔開美金愈印愈多嘅死胡同。

古勝始終對煤炭股情有獨鍾，前排推介嘅兗煤（01171）收穫唔小，但派完成績表之後有回吐，可考慮換入神華（01088），賣現貨煤嘅股升完就輪到合約煤股，麥格理前日出份報告都叫人咁做。

天氣因素利好煤價

呢個月嘅煤價升得好犀利，除咗踏入冬季係傳統旺季之外，今年冬天「有消息」話會特別凍，而十月尾有幾個地區已提早入嚴冬，廣州亦得番十幾度，如果天氣繼續凍，煤股升勢會勁過其他資源股。另外，祖國第二輪煤炭業重組將啟動，講到明由大食細，大煤企嘅市佔率會升到超過5成。神華作為龍頭股，短線走勢落後過兗煤，中線走勢差過中煤（01898），應該係時候急起直追。

戰報

蒙古投資（00402）+26%

詩詩喺十月四日料蒙古投資未來收入大增，昨高見過0.22元，較推介日低位最多可賺26.4%。

先施（00244）+23%

帥哥尋日建議吸納先施，指可落後，昨日曾低見0.89元，高位為1.1元，最多升23%。

古勝