「巨無霸」新股友邦保險（ＡＩＡ）（01299）聽日喺香港上市，通常呢啲大公司上市儀式都好大陣仗，出席嘉賓直情可以用粒粒皆星嚟形容。絲絲聽聞友邦會率領一眾高層出席，包括執行主席杜嘉（Mark Tucker）及ＡＩＧ行政總裁Robert Benmosche，至於係友邦代表人物嘅名譽主席謝仕榮，以及非執行董事蘇澤光、出名多計嘅獨立非執董許仕仁等亦預期會出席。
另外，港府及港交所高層代表包括陳家強及夏佳理等亦會到場，可見香港對呢隻「巨無霸」上市幾咁重視。
的而且確，友邦今次上市真係創造咗唔少歷史，除咗打破香港嘅集資額紀錄外，亦首次為員工優先認購採用粉紅表eIPO。喺一千八百多名合資格僱員中，有逾一千三百名僱員認購，其中有九成採用網上認購，所以友邦都可以話係本港最「先進」嘅公司，因為有咁多「Hi Tech」員工！計絲絲話，應該頒個獎畀佢哋啦！
經紀方面，有五千至六千人共申購逾二千九百六十萬股，當中有逾四成嘅「一級代理」以及逾六成嘅「二級代理」利用粉紅表eIPO。
余絲韻