市場熱線：朗生醫藥收集完成

港股開波仲好哋哋，曾經倒升過百點，但未夠11點開始插水，收市恒指跌幅1.85%，國指跌幅2.81%，主板成交接近千億。勉強要搵解釋嘅係美金轉強，但美金隔晚已回升，隔晚道指冇乜反應，道指期貨亦係跌50點左右，A股其實下晝至開始腳軟，所以港股尋日只係自己唔爭氣。

美元走勢左右市況

事後孔明嚟睇，港股有調整係好正常，花旗下個禮拜有兩單大嘢，吉凶難料，穩陣派先走部分貨係人之常情，但期指結算前咁搞法就引人遐思。恒指已經連穿10日同20日線，下個支持位喺23,000點關口，如果美金反彈惡唔出樣嘅話（執筆時美匯指數已由最高78.13回落到77.74），呢次只算係健康調整。

借住美金反彈嘅同時，人仔尋日一度跌超過200點子，而且已經係連跌4日，G20財長會議擺明冇料到，花旗國嘅損人利己行為犯眾憎，向人仔施壓亦得唔到支持；下一round係呢個禮拜喺河內嘅東亞領導人會議，匯率仍係主要議題。人仔升值嘅預期已經減弱，對港股上升動力會稍有影響。

快意節能（08032）批股曾經穿底，收市啱啱守住0.67元嘅批股價，另外李寧（02331）公布第三季同店銷售僅增長4%，仲衰過中國動向（03818），間公司改完logo之後好似反應麻麻，品牌老化加埋競爭激烈都幾擇使。李寧以前係國家英雄，但八十後只係識佢前年喺奧運開幕禮表演，所以用自己個名做生招牌都要計「折舊」。

美金升就肯定不利資源股，滬綜指又失守3,000點大關，唯一支撐係藥股，內地發現超級病菌死咗3個人，藥股立即有反應。

其實祖國要刺激內需，又要解決貧富懸殊問題，一定要對症下「藥」─醫療保障金額同範圍會愈來愈大，人口又開始老化，所以古勝一直長線都睇好醫藥股。

有機會重上招股價

本地上市嘅藥股亦跟住炒上，成為逆市奇葩，另一原因係隻四環（00460）今日上市所帶動，暗盤價升超過兩成。

藥股分好多類，太高端嘅要行內人先識，今年五月上市嘅朗生醫藥（00503）做風濕藥，屬人口老化概念股，今年五月上市曾經創下超額852倍嘅紀錄，但新股有太多散戶入飛未必係好事，所以上過5.25元之後好快就腳軟，仲潛水咗好耐，尋日逆市升5.8%，收報3.84元，雖然仍低過招股價3.91元，但已高過近3個月幾次頂位3.8元。

朗生今年嘅預測PE超過20倍，但出年盈利會有約40%增長，一一年PE降至約15倍，同類股中屬於唔高唔低，但藥股喺呢個升浪中包尾，一係唔升，一升就非同小可，尤其朗生收咗幾個月貨，若突破招股價「錢」途光明。

戰報

中視金橋（00623）+27%

帥哥上周五指中視金橋升勢未盡，推介當日低位2.4元，昨高見3.05元，跟足最多可賺27%。

景福集團（00280）+18%

小尾周一推介景福，指受惠於內地居民消費力增強，昨高見2.64元，較推介日低位升逾18%。

古勝