市場熱線：中海化受惠產品漲價

個市缺乏方向，有人話係因為觀望G20財長會議喎。唓！呢啲會議開多幾百次都唔會傾出乜嘢結果，各家自掃門前雪，巴西連出席都費事；好似美國佬叫限制貿易順差同逆差，又係另一瓣「損人利己」嘅招數，同上次蓋特納叫有能力國家多多消費一樣，其他國家睬佢都傻。

港股上禮拜五跌131點，成交840億元，睇嚟呢個禮拜都仍會牛牛皮皮。上個禮拜最勁係車股同零售股，後者已炒至第N輪，黃金周後諗住會散水，點知仲可炒多浸，好消息係九月旅客數目大增；另外，對抗通脹最佳方法唔係投資保值，而係使晒啲錢最實際，尤其對班冇錢投資嘅「月光族」而言，通脹帶動零售股並非虛言，但最大得益者依然係本地地產商。

A股出現滬弱深強現象，更加奇怪嘅係股指期貨高水近百點，中金所要規範9大異常交易行為，淨係每日成交量同持倉量唔成比例已可列為畸形。國企股將陸續派第三季成績表，煤炭股同鋼鐵股優劣立見。記得八月尾派中期成績表時好多公司都「見光死」，睇番第三季相比去年同期基數已高，攞高分已唔容易，就算績優股都驚住獲利回吐，所以炒業績要格外小心。

農民收入大躍進

「十二五」嘅重心係推動內需，扶農政策少之又少（主要係推進農業現代化），因為農產品價格係咁升，農民收入已經「大躍進」，扶不扶持冇相干。隻中海化學（03983）近期升勢並非「一支箭」方式，而係沿住條上升軌一路慢慢去，走勢更為健康。國際農產品價升，自然吸引耕種積極性，化肥價格亦水漲船高，山西尿素價格已由七月初嘅每噸1,550元（人仔‧下同）升至1,850元以上，中海化升勢並非單純炒作。

中海化上半年成績表冇乜增長，主要係當時化肥價格仍然低迷，僅靠另一業務甲醇量價齊升去支撐，依家化肥行情回升，甲醇價格亦繼續向上，由「十‧一」前的每噸價格2,450元升至2,850元。

當然，尿素同甲醇漲價嘅主要原因，係上游天然氣價升咗25%，但最受影響嘅只係嗰批冇乜背景嘅細企業，中海化有中海油（00883）做後盾，行業整固反而有着數。

戰報

海信科龍（00921）+13.82%

高仁上周四建議追入海信科龍，上周五高見4.53元，較推介當日低位3.98元高出13.82%。

重慶機電（02722）+11.11%

古勝喺上周二推介重慶機電，當日低位2.52元，上周五創出五十二周新高2.8元，升幅11.11%。

古勝