隨着友邦（01299）及農行（01288）呢啲重磅股喺香港成功上市，香港嘅集資中心角色又再穩固咗，愈嚟愈多金融機構駐重兵喺香港，大有跟隨滙控（00005）東移策略之勢。
其實唔單只香港，成個亞洲區嘅ＩＰＯ都好旺，有數得計㗎，絲絲睇彭博社資料顯示，金融業過去一年嘅全球首五大上市活動都喺亞洲進行。
排住隊巨額「抽水」嘅勢頭喺呢兩年都應該冇變，區內專做金融業（ＦＩＧ）顧問生意嘅「賓卡」可以話做到冇停手。有見及此，有消息話野村、高盛、美銀等大行急急安排人手去亞洲增援，以免肥水流去別人田，既然增兵，就梗係要有將領才可成事。
嚟自倫敦嘅野村董事總經理Peter Sternby、紐約嘅高盛「賓卡」Peter Enns等，近期都搬到香港駐守。老友話，明年會仲多呢類型嘅阿頭駐港。
家陣啲亞洲ＦＩＧ「賓卡」零舍矜貴，老友話好似高盛、大摩呢類股票包銷龍頭都好驚畀對手挖角，例如巴克萊、大和證券呢啲大行都正在擴充，所以嚟緊要擴軍之餘，都要度橋保住班舊人。
余絲韻