絲絲講場：渣打藝趣嘉年華跳「日舞」
渣打香港每年都會舉辦「藝趣嘉年華」，話明係嘉年華，宣傳攻勢就梗係要夠噱頭及富趣味性，先可以吸引多啲人注意。去年佢哋喺分行推出扭蛋機，絲絲都扭咗幾隻，今年佢哋就主攻Facebook（FB）平台，喺Facebook度邀請各路人馬一齊大跳「日舞」（Sun Dance），實行嚟個先聲奪人。
FB設專頁自製短片
今年渣打「藝趣嘉年華」會喺十一月十三日及十四日於維園舉行，屆時全場人士會一齊跳「日舞」，感受嘉年華氣氛。為咗令大家對「日舞」有多啲認識，渣打特登喺Facebook上開設專頁，畀大家上載自己與朋友嘅相，等佢哋化身為卡通人物，製作個人化嘅「日舞」卡通短片，然後轉發畀親友。此外，渣打亦希望將嘉年華氣氛散播畀員工，所以日前就請咗舞蹈師去到分行及員工餐廳，率領員工跳番餐。
絲絲覺得，前線員工平日要面對上頭定落嘅目標，又要謹慎處理客戶訴求，工作壓力可想而知，難得可以喺工作間舒展一下筋骨，都幾好吖！
余絲韻