絲絲講場：滙控棄購Nedbank遭狂轟
滙控（00005）喺上星期宣布放棄收購南非嘅Nedbank，呢單嘢仲有下文，有消息話滙控對Nedbank餘情未了，只不過係嫌佢貴，絲絲唔知呢個係咪實情，只係知南非嘅監管機構好嬲，一於咬住唔放，仲話滙控冇責任感。講到呢度，好似電視劇情一樣：有人悔婚，外父及外母好不滿婚事張揚晒，但個女就嫁唔出。
南非當局斥不負責任
南非監管當局就呢單交易出聲，話滙控喺冇披露原因之下突然終止收購Nedbank，係不負責任嘅行為，認為會引起外界對Nedbank不必要嘅揣測，對Nedbank股價有負面影響。未鬧完㗎，佢哋仲話對滙控嘅職業操守感到遺憾，認為其行為違反市場負責及公平嘅精神。
據消息靈通人士話，呢次「悔婚」係由滙豐執行董事霍嘉治做「醜人」，喺最後關頭至通知放貨嘅Old Mutual，話要終止收購，但據悉終止收購與盡職審查結果無關。咁係乜嘢原因，真係只有滙控自己知喇！
滙控喺早前已經提出要進軍「靈貓六國」（CIVITS），如果呢個係佢哋中期甚至長期嘅政策，佢哋對於南非呢個市場應該冇咁快放棄嘅，如果真係因為嫌個價貴，Old Mutual可能要低啲諗，降價出售Nedbank。
余絲韻