絲絲講場：麥博士轉Title表明身份
「新興市場之父」麥博士（Mark Mobius）近排改咗Title（職銜），由鄧普頓資產管理執行主席改為鄧普頓新興國家投資團隊執行主席，令絲絲聯想起已屆73歲嘅麥博士係咪想逐步淡出，為他日退休鋪路。
絲絲向該公司了解過，原來今次轉Title係麥博士嘅主意，佢覺得自己一向都係做投資，而唔係做行政嘅工作，新Title令人更清楚佢嘅工作範圍。其實鄧普頓全間公司都係做新興市場投資，麥博士係「最高領導人」，Title係乜都唔會影響佢嘅地位，事實上佢原本嘅Title亦都冇人頂上。
熱愛投資冇諗過退休
麥博士講過佢自己好鍾意做投資，冇諗過退休，亦冇好似「股神」巴菲特咁安排繼任人，因為佢哋嘅基金係Team approach（團隊投資模式），加上喺每個投資市場都已經有得力嘅基金經理，就算佢退休都唔影響基金嘅運作。計絲絲話，麥博士加入咗鄧普頓廿幾年，應該已經將功力傳晒畀助手啦。
余絲韻