絲絲講場：王以智年底退休轉幕後
有「滙豐一姐」之稱嘅滙豐私人銀行亞洲CEO王以智（Monica）會喺今年底榮休，大家對Monica嘅一姐印象應該唔會陌生，佢喺4年前以1.2億元天價聘請拉丁舞王學跳舞，但因為導師態度惡劣而入稟索償學費，全城引為談論。Monica今次離職其實係「退而不休」，佢雖然唔做滙豐私人銀行嘅亞洲區一姐，但佢仍會出任非執董職位。
滙豐私銀亞洲轉雙帥
記得本月初滙豐私銀喺灣仔藝術學院搞咗個慈善晚宴，除咗請嚟倫敦頂尖舞蹈家，仲有「千億新抱」徐子淇出席，由此可見Monica縱橫商界嘅交際手腕，當然亦與佢家族顯赫，係已故船王王國桐嘅女兒有多少關係。
根據滙豐嘅通告，Monica嘅職位喺明年會一分為二，依家嘅大中華地區私人銀行市場主管廖淥波會升任為私人銀行北亞區主管，而新加坡私人銀行市場主管Nancie Dupier就會出任私人銀行東南亞區主管；至於歐洲、中東及非洲區嘅新任私人銀行行政總裁，就會由Alexandre Zeller接任。佢哋3位喺私人銀行嘅業務都會直接向環球私人銀行行政總裁Chris Meares匯報，而Chris亦將配合滙控（00005）東移亞洲嘅策略，好快就會搬嚟香港Office返工。雖然係咁，環球私人銀行嘅總部仍然會保留喺歐洲，睇嚟Chris遲啲都要喺歐亞兩地穿梭，做「太空人」周圍飛喇。
余絲韻