市場熱線：海爾發展商機龐大

港股好似冇乜方向，開波初段跟美股升，然後跟住A股倒跌，到三點又跟歐洲股市抽上，表面上係隨波逐流，但大戶點會咁「隨機性」，喺呢200-300點區域轉到你暈陀陀，玩小浪之後再玩大浪。

恒指現貨升92點或0.39%，但國企指數升1.24%，成交940億元。美元升一日又冇貨賣，美匯指數跌穿77，歐元升穿1.40。

北大人刻意淡化GDP

朝早祖國公布經濟數據，大家睇住GDP同CPI，人行周二拿拿臨加息嚇親人，結果CPI開出3.6%又唔係咁高啫，有經濟專家即刻話年尾前都唔使加息，但其實十月至係高峰，棉花、玉米、大豆、糖價都狂升，祖國忍咗咁耐突然加息唔會無端端。

GDP回落到單位數字，國家統計局個發言人解釋係舊年基數高，大家亦覺得「收貨」。不過，「十二五」規劃刻意淡化GDP，暗示「保八」已唔重要。祖國已非一窮二白年代，要「保八」愈來愈難，改為關注民生仲好過；而班地主開始識驚，以前為「保八」始終會手下留情，依家就冇咗個「保護傘」。

另一樣對內需同GDP影響好大嘅係砵砵車，由鋼鐵、橡膠、零件、銷售、廣告、保險、公路成條產業鏈一匹布咁長，車股呢排升到煞唔到掣，出年會點？買車優惠會否再延期？如果延期又可短炒，但唔延期就大件事，不過中央講明谷內需，照計唔會咁無情。

友邦（01299）尋日截飛，今日到男裝長興（00238）接力，利邦（00891）同利郎（01234）珠玉在前，肯定大把捧場客；但遲啲好孩子招股會更受注目，第一上海（00227）當年如果唔沽貨就發達。

創維（00751）依家每個月公布親銷量就例插，同舊年好景時啱啱掉轉。舊年電視機股威晒，今年就係隻洗衣機股，海爾電器（01169）尋日衝破7蚊大關，雖然話產品好賣，但淨係賣洗衣機同熱水器好難支持股價大升，大家都睇住佢嘅新業務搞成點。

海爾今年第二季開始搞分銷業務，毛利率暫時只得1%，但金額大「斬埋有柴」，一季已賺超過8,000萬元；上季開始搞埋物流，向住「一條龍」服務進發。

拓展分銷按部就班

原本「大魔頭」出過報告話海爾會收購阿媽嘅「日日順」網絡，做「農村國美」玩埋零售，但間公司決定一步一步來，先搞分銷、再搞物流，公司有十幾億現金都唔派息志不在小。

搞零售網絡最緊要係能否吸引其他牌子供貨，如果只靠海爾同幾隻外國牌子就好難做大；雖然話「同行如敵國」，但如果海爾個網絡做得好，本地牌子為本身利益供貨畀你並不為奇，所以海爾嘅想像空間其實好大。

戰報

耀萊集團（00970）+13%

帥哥喺周三推介耀萊，憧憬未來收入擴大，昨高見1.27元，較推介日低位累升13.39%。

寶勝國際（03813）+12%

高仁喺十月七日指寶勝毛利和純利率可上升，昨高見1.26元，較推介日低位最多升12.5%。

古勝