正所謂聚沙可成塔，一個人做義工，又豈及成班有心人一齊做義工嘅成效嚟得明顯？花旗喺本周末將會舉行第5屆「全球義工日」，集合全球100個地區嘅義工，喺同一日於各地一齊做義工，花旗香港嘅員工今年會參與21項唔同嘅公益活動，包括賣旗籌款、大自然步行籌款、舉辦理財教育講座以及傷殘人士工藝班等。
絲絲尋日喺今次活動嘅誓師儀式上，撞見花旗集團香港區資本市場及企業銀行業務總裁麥永森（Alvin），睇見Alvin好落力咁呼籲身邊嘅同事要積極參與「全球義工日」，原來佢希望今年參加活動嘅員工人數，可以突破去年嘅2,300人喎！
Alvin自己當然亦為善不甘後人，佢喺本周末會去東華三院探訪老人，佢仲同絲絲講，話明白到「全球義工日」每年只係舉辦一日，雖然員工做唔到太多嘢，但更重要嘅係向員工傳遞關心社會嘅訊息。
余絲韻