《黑天鵝效應》作者塔利布因提出睇嚟極唔可能發生，而又確實影響世界嘅大事而揚名天下，佢早前出席一個論壇時繼續語不驚人誓不休，當着美國財長蓋特納面前，話聯儲局將於25年內消失，甚為驚嚇。
佢出席嘅論壇高手雲集，塔利布當日係緊接蓋特納之後出場發言，即使係咁佢一樣「冇面畀」，毫不客氣咁批評好多學者及政客喺金融危機爆發後，先至識得馬後炮，直斥呢班人所講嘅說話唔值得聽，之後仲燒埋諾貝爾經濟學獎得主克魯格曼及暢銷書《地球是平的》作者弗里德曼嗰疊，質疑根本冇幾多個所謂經濟學家嘅人，喺危機前真正理解系統風險係乜，又批評克魯格曼支持喺財赤下維持政府開支及將私人債務轉化成公共債務嘅立場，係違背風險管理及不道德，因為子孫輩將要承擔惡果。
塔利布已經唔止一次四圍點火，美國總統奧巴馬、美國國會以至聯儲局主席伯南克皆無一幸免，當中佢曾狠批伯南克無知，又批評畀伯南克連任嘅國會議員完全不負責任，依家佢更推斷聯儲局將於25年內消失，合晒合尺。
余絲韻