百物騰貴，近期唔難發現市面上嘅快餐店都悄悄加咗價，作為商人為咗賺多啲，又唔想引起消費者太大嘅回響，惟有諗吓辦法喇！
一向有食開即食麵嘅絲絲發現，原來康師傅（00322）呢位即食麵「一哥」，都為佢哋旗下即食麵「瘦身」，康師傅本月出廠嘅招牌即食麵──紅燒牛肉麵雖然價錢冇變，但麵餅就縮水5克至10克，唔怪得絲絲覺得食完後好似仲係唔多夠飽啦！
康師傅早排喺中期業績會嗰時講過，話暫時未有計劃將產品加價。康師傅前日發表聲明話，因為今年以嚟生產即食麵嘅主要原材料價格有唔同程度嘅大幅上升，調整產品係基於要盡量滿足消費者需求及應對市場經營環境嘅變動，所以先用權宜之計，仲話對消費者嘅影響程度係相對有限喎！
其實計絲絲話，咁樣嘅「瘦身」行為咪即係變相加價，不過老友話，絲絲食少5克至10克同樣可以「瘦身」喎！
余絲韻