「股神」巴菲特係投資界萬人景仰嘅大師，佢接受財經頻道CNBC訪問時，自爆投資生涯最愚蠢嘅決定竟然係巴郡！佢咁講真係令人大吃一驚，巴郡依家每股價值超過12萬美元，好多人都希望自己嘅投資組合中有呢隻股份，畀一股我絲絲都好吖！
巴菲特自爆話，喺一九六四年因意氣用事而買入一家當時正沒落嘅紡織公司，呢間紡織公司係巴郡嘅前身，亦即係股神依家嘅投資旗艦。佢話如果當年收購嘅係一家保險公司，巴郡嘅市值可能較依家多2,000億美元（約1.56萬億港元）。
股神咁後悔買巴郡，可能係與過程相當不愉快有關。話說佢當年睇準巴郡管理層一邊出售資產一邊回購股份，就想平價買入股份再轉售畀巴郡管理層「撈一筆」，當佢與巴郡管理層斯坦頓協議以每股11.5美元出售手持股份畀巴郡，呢班管理層竟耍花招，喺出售通告上將作價壓至每股11.375美元，令股神非常激氣，於是狂掃巴郡股份，取得控制權後再怒炒斯坦頓洩憤。為啖氣嘅股神，終耗上足足20年時間才能擺脫紡織業務。
巴菲特「自暴其短」，無非想告誡世人，以合理價買優質資產，好過以平價買爛資產，又話要證明自己係個高明嘅生意人，就要識得收購優質資產，因為做生意唔同奧運比賽，毋須向高難度挑戰以凸顯才能。
余絲韻