市場熱線：聯通有勢穩步上揚

先講美金，前日喺亞洲時段升咗半日已回穩，結果只係亞洲魚缸受害，道指續升80點，蓋特納仲話唔會用美金貶值去刺激出口，雖然唔知佢係唔係「講一套、做一套」，但美匯喺76.5至77水平好似有見底迹象，另方面，美金同股市嘅「方程式關係」漸見脫鈎。

大戶開邊瓣唔易估

再看蘋果公司同IBM喺隔晚美股收市後派成績表，成績表合格有餘，但喺延長交易時間即插，唯一解釋係股價早已炒到新高，即係趁好消息出貨；所以話，美國企業絕大部分放榜攞高分係意料中事，但大戶搞邊科就冇人知。

祖國魚缸亦係無定向風，滬綜指上晝收市仍微跌，但下晝挾上1.58%，仲企喺3,000點樓上收市，而且唔似早排「升大唔升細」，尋日升勢好全面，創業板指數升達6.8%。執筆時傳來人行調高存貸款基準利率0.25個百分點，且看祖國魚缸今日如何反應。

恒指尋日上晝只係升百零點，但下晝跟住祖國魚缸挾上，升勢亦瓣瓣有，只係內房股差啲，內需股已係升市嘅「中堅分子」，依家做埋「三頭馬車」嘅「頭車」，雖然依家普遍PE都係20倍過外，但唔夠30倍PE都有得諗。

當然又唔係隻隻內需股都掂，澳優（01717）上市後第一份成績表已經舉白旗，稍後有兩隻乳業股上市都谷唔起，睇怕有排都唔使望。中國動向（03818）稍有起色，第三季同店銷售增長4.7%，比第二季有好大改善，但同其他體育用品股相比仍係差幾班；隻股上市時市值仲高過李寧（02331）同安踏（02020），到依家發覺唔掂時至猛攻宣傳，但又不可睇得太死，因為佢PE同息率幾吸引，可列入「觀察名單」。

祖國電訊股屬於低風險、低回報嘅投資類別，所謂各有所愛，如果覺得呢排炒味太濃，又唔想將錢放入銀行變相貶值，其實揸住電訊股都係一個幾好嘅選擇。想當年，香港搞3G都要經過好幾年艱難期，但今年iPhone同Andorid電話有爆發性增長，即係由科技帶動普及。

祖國3G市場潛力厚

祖國3G有「後發優勢」，但第一年反應唔理想完全唔出奇，對新嘢未有信心係人之常情，但跟住就會進入成長期。二奶電話（00762）剛公布九月上客數據，3G淨增加104.3萬戶，比八月101萬戶略增，總數已超過千萬戶，雖然上客速度同官方今年目標仲差好遠，但應該會愈來愈快，依家仲可趁「低」吸納。

二奶電話前日稍跌穿50日線（11.15元）即告反彈，尋日回升3%，應可沿住50日線再上，勝在風險細。

戰報

中國貴金屬（01194）+13%

桃桃上周一指中國貴金屬上升動力增強，股價昨日高見1.95元，較當日低位累升13.37%。

TCL通訊（02618）+29%

帥哥十月七日指TCL通訊有力再創新高，昨再創52周高位，較推介當日低位5.05元升29.3%。

古勝