絲絲講場：紀勤Nedbank交易失敗作結
滙控（00005）為咗由邊個做主席、行政總裁呢件事，成個「開片」過程暴露於人前，絲絲最戥行政總裁紀勤難堪，唔知係咪黑開有條路，由佢穿針引線收購南非Nedbank嘅計劃以失敗告終，紀勤離任在即，不幸地成為佢臨尾失敗之作。
絲絲相信，今次唔單只紀勤失望，滙控要進軍「靈貓六國」（ＣＩＶＩＴＳ）之一嘅南非以擴大喺新興市場嘅業務，睇嚟要再搵過下一個收購對象。
其實紀勤都幾黑仔，之前諗住收購韓國外換銀行（ＫＥＢ），最終臨門撻Ｑ，估唔到今次收購Nedbank已進入獨家商討階段，最後依然未能成事。
李瑞霞升任亞太財監
滙控早輪公布嘅人事調動中，除咗紀勤之外，仲有麥榮恩，佢好快就會升任滙控財務董事，佢原來嘅滙豐銀行亞太區財務總監職位會由李瑞霞（Sarah Legg）升任，任期由十二月初開始。
升遷層層遞進，咁原本嘅財務董事去咗邊？佢咪就係下任主席范智廉囉！
余絲韻