孖妹缸湖遊：十月避災抑或要Join？

孖妹炒股年資尚淺，但都知道十月份傳統被視為「股災月」，呢個講法喺八七年全球股市狂瀉時出現，當年港股喺十月由3,943點跌至2,240點，急挫43%，如果投資者個膽細啲，真係好易畀個市嚇死㗎！

另一次十月股災就係九七年亞洲金融風暴，當年恒指由15,048點跌至10,623點，跌幅都有29%。不過，港股又唔係每年十月都有股災出現嘅，但世界上有「好嘅唔靈醜嘅靈」呢回事，所以大家都係聽吓專家意見好啲。

沈：訊匯證券行政總裁沈振盈

黃：豐盛金融資產管理董事黃國英

沈振盈：防下旬急跌

高妹：沈大師，股壇之中識睇市況又識睇風水術數嘅應該得你一個，本月港股氣數如何？

沈：今個十月係丙戌月，配合埋流年月份去睇，情況就唔係太好，因為屬火比較強，雖然火本身可以煉金，對股市、金融股會有利，但呢個係洪爐猛火，變相會熔金。照我估計，十月八日（上周五）港股已經開始聚頂回落，今個月恒指應該會跌。

莉莉：不過近期市況氣氛真係唔錯，港股成交額又有增加，更有新股首日上市爆升超過一倍喎！

沈：從理性角度去睇，其實當牛市去到某階段，指數有所調整係正常嘅。公司業績喺八、九月公布晒，投資者對明年企業盈利或唔太樂觀，有可能會先沽貨，然後明年再重新部署入貨。另外，臨近年尾唔少基金都要埋單計數，佢哋都會沽貨套現用嚟出糧、出花紅。

高妹：適度調整對股市都健康嘅，咁有冇話要特別注意邊啲日子？

沈：從風水術數方面推測，恒指喺本月二十二日後嘅跌勢會明顯，而十五日及二十九日會跌得較急。概括而言，十月份港股較為反覆波動，恒指累積跌1,000至2,000點都唔出奇，所以大家嘅投資策略要轉為保守少少，但亦要識得隨機應變。

黃國英：「金災」先至

莉莉：黃Sir，我知你有開班教人炒股，你縱橫股場多年，究竟十月有冇股災㗎？

黃：我睇好十月港股喎！因為市場資金真係太多喇，多到要用「澎湃」去形容。現時啲人認為銀紙唔值錢，於是不斷搵嘢買，你見金價升得咁勁，就知道投資者對貨幣冇信心啦。

高妹：即係今個十月冇股災啦，但資金多真係夠力撐住大市咩？

黃：你講嘅股災遲早會出現，不過唔喺十月，恒指調整應該會喺十一月中先出現。總之喺美國十一月中期大選之前，大家都會繼續「做好」呢個夢，個市唔會大跌。另外，金價創新高亦反映市場有多餘資金，依家金價跌10蚊，之後又會升番30蚊，我反而覺得「金災」會快過「股災」出現，當金價大跌，大家就要即刻沽股票喇。

莉莉：係喎，最近金價真係升到癲晒，我真係唔敢買。

身處泡沫 仍有得博

黃：其實我哋已經喺泡沫入面，只係未知幾時會爆，其實有好多二線股票升得快過大市，汽車股就係例子；總之，投資者嘅入市態度唔好跌市時嚴謹，升市時寬鬆，今個月入市都仲有得博，不過就要識得揀股票。另外，除咗睇住金價走勢，大家都要睇埋巴西、印度嘅股市，佢哋升得仲勁過港股，如果佢哋個市跌，我哋就要醒目啲走貨。

高妹：既然十月仲有得升，咁我哋應該買乜嘢貨？

黃：唔好掂汽車股喇，風險太高。我睇好二線地產股如嘉華國際（00173），現時內銀股亦真係抵到爛，隻隻都入得過，不過就唔好買農行（01288），呢隻股靠「蜜月期」係咁升，但A、H股差價太遠，內地A股開番市，佢未必企得住；石油股亦可以追落後，有機會被炒上。

散戶小心駛得萬年船

孖妹與兩位專家傾完，梗要再問吓股友意見喇。股友黃先生話覺得今個十月唔會有股災，「依家港股咁旺場，唔使驚嘅，恒指調整5%都係正常，跌20%就話係股災啫！不過十月始終唔好太勇，因為啲大戶已經部署出貨，我都會跟住佢哋做嘢先。」

股友董先生嘅意見就相反：「恒指升得太多，大戶都派緊貨啦，加上歐美經濟仲好差，靠中國頂住個市都有壓力，十月股災可能出現㗎！」不過佢都睇好港股整體第四季表現，認為恒指有機會升至26,000點，只係十月入市會驚啲，所以都係跟炒國策股為妙。

今輪新股潮54%散戶有賺

近日新股浪接浪，當中有唔少表現理想，更有個別新股首日升逾一倍。喺今輪新股潮你又賺咗幾多？據今期《東方產經》網上民調，截至上周末晚上6時嘅結果顯示，25.7%人話賺三成以上，賺一成至三成嘅佔16.6%、賺一成以下嘅佔11.6%，而平手以及蝕錢嘅就分別佔19.4%及26.7%。

高妹、莉莉

若有料報畀高妹同莉莉或有嘢問，可電郵money.biz@opg.com.hk