市場熱線：華潤電力可追落後

呢排花旗嘅經濟數據偏好居多，不過就同QE2拉鋸，暫時焦點會放喺企業放榜月，打頭陣嘅「美女」果然夠靚，古勝講過花旗公司成績表好過預期係「劇本」早已寫下，至於會否因而帶動美股同港股挑戰高位則係後話。至於祖國魚缸放完假返嚟生猛晒，今次滬綜指一舉衝破2,700點大關，是否轉弱為強仲要睇多一、兩日。

不過，中國依家成為「槍打出頭鳥」對象，溫總去歐洲話買國債博好感，點知歐盟唔領情企喺美國同一陣線逼人仔升值，諾貝爾和平獎頒畀劉曉波係另一種「明示」，中國如果繼續打「稀土牌」肯定會搞到同其他國家關係惡化，而且其他國家並非冇稀土資源，只係長期畀中國「頂爛市」而放棄開採，所以溫總安撫西方話冇禁制出口係明智之舉。

中國稀土（00769）呢個月爆升咗1倍，間公司雖然冇稀土礦資源，但外國企業買唔到上游，買下游產品價更高，但升到呢個價位仲抵唔抵買就好難估計。

另一焦點係人仔升值，上周五升約200點子，但以上個禮拜美匯跌幅計算，呢個升值幅度只係「應酬式」。美匯指數跌到77之後，卒之好似有啲支持，成為股市嘅「暗湧」。

唔畀加費或有補貼

魚缸雖然㷫合合，但主題曲都係輪流炒作，電力股係呢排嘅弱勢股，自從上月中「花旗邦」發報告言之鑿鑿話7省加電費之後冇咗下文，電股升勢曇花一現。事實上，祖國一直驚「通脹猛於虎」，對於影響民生最大嘅電費想加真係冇咁易，係都會等通脹回落至有機會。不過，「花旗邦」同時話，就算唔批准加電費，亦會用「阿公錢」去補貼。

電股弱勢係因煤價高但電費又冇得加，但煤價呢排總算平穩，間間電股近年都積極買煤，達到「煤電一體化」就一天光晒。華潤電力（00836）都係向住呢個方向走，預測PE約13至14倍，近期走勢大落後，如果7省加電費消息落實當然最好，其次由政府補貼亦係好消息，但就算兩個消息都落空，潤電嘅再跌空間亦係有限，唔排除市場輪流炒到大落後嘅電力股，潤電有機會回升到17.5至18元之間。

戰報

一拖（00038）+16%

古勝九月二十八日指一拖可追落後，上周五創52周高位7.13元，較推介日低位升16.69%。

金山能源（00663）+11%

古晨本月七日推介金山能源，上周五股價高見0.207元，較上周三低位0.185元，升11.89%。

古勝